FAATUPULAIA LE FAAMAI SUKA – TATOU TE LE O ANO IAI AE TOATELE UA AAFIA AI MA ONO AAFIA AI

0
500

O LOO FAIA SE SUESUEGA AUILIILI I AI LATOU O LOO AAFIA, MA UA I LE TULAGA E ONO AAFIA AI I LE MAI SUKA, E LE VAEGA MO LE SOIFUA MALOLOINA O LE PASEFIKA – O SE TAIMI MUAMUA LEA UA FAAGASOLO AI I SINI AUSETALIA.
By Dr.Olataga Alofivae Doorbinnia.
Faaliliuina: Lemalu Nele Leilua-FaaolaolaSamoa Apia
FAATOMUAGA
E faatalofa atu i le mamalu o le au faitau ma paaga a le tatou nusipepa – e faapito augafa se faamatalaga i le gasegase o le mai suka. O le mai suka, ua faatuputupulaia i latou ua aafia ai i totonu o Sini Ausetalia, Niu Sila faapea foi ma Samoa. O se avanoa faaauro lea ua matou maua e auai e faatino nei suesuega ina ia iai se suiga, ma faasaoina mai nisi
E momoli le faafetai tele i le lagolago malosi a Faapotopotoga o tagata Samoa i Sini faapea ona taitai i lenei suesuega. Ma ua avea lenei poloketi ua mafai ai ona galulue faatasi taitai o faalapotopotoga eseese – ina ia ausia auga ma sini ole poloketi, ma faailoa ai le mitamita o nei taitai i a latou tu ma aganuu, faapea le agaga foai o o tatou tagata.
E le faagaloina foi le lagolago a nisi o tamalii o le atunuu ua lisi atu i lalo;
• Le afioga a le tamaitai Hai Komesina o Samoa, Hinari Petana – faafetai mo upu faalaeiau ma lau faasoa o ou tomai i le faamoemoe;
• Le Konesula o Samoa – Afioga Fonoti Manogiamanu Etuale Fonoti mo lau taitaiga
• Taitai o le faalapotopotoga La’u Samoa – Susuga Emani Alalatoa – Peresitene faapea le komiti mamalu;
• Le Fono a Samoa – Susuga Leilua Jerry Uesele ma ona soatau;
• Le paia lasilasi o le mamalu o le atunuu o loo ua aafia i le mai suka, ua faapea ona faaavanoa mai o latou taimi ma lagolago mai i fonotaga;
• Tagata a nuu o Samoa i soo se tafa mai le au tusitala, au faasalalalu, ofisa o faamasinoga, auaunaga tausi mai faapea galuega fesoasoani mo tagata lautele;
Ae muliai se faafetai i ao o faalupega i soo se fata faitaulaga i Sini Ausetalia
E faamalulu atu foi pe afai e iai nisi ua galo ma le taua o latou suafa.
O lenei poloketi mo le soifua maloloina – ose polokalame sa uunaia e le vaega o le Powell St Family Practice i Yagoona, ma sa faatautaia i lalo o le taitaiga a Dr Olataga Alofivae – Doorbinnia ma ona soatau i le galulue faatasi ai lea ma le Iunivesite o Western Sydney i lalo foi o le taitaiga a le Polofesa o Jennifer Reath ma Polofesa David Simmons ma ona soatau.
O sini autu o le tagai lea ini auala poo ni alafua e tau foia ai le gasegase o le mai suka i tagata o le Pasefika o loo mafuli iai le toatele, ma sailia ni auala e faaititia ai aafiaga i mai suka, ma ni pa puipui o loo le mafai ai ona faaitiitia le faitau aofai o i latou ua mai suka, faapea ni fautuaga ina ia maua se taunuuga lelei mo le soifua maloloina o tagata lautele mai le ono aafia ai i nei faamai le pipisi.
Na valaaulia foi e le vaega o le au suesue i le Iunivesite le toatele o taitai o faalapotopotoga a Samoa ina ia faatuina se tino maoti lava e latou te mataitu ma tuuina atu ni fautuaga talafeagai mo nisi poloketi o suesuega a le Pasefika tau soifua maloloina. O nei fautuaga tusitusia ma faamaumauina o le a tele se aoga mo o tatou lava tagata a nuu o aumau i Sini ma isi setete o Ausetalia atoa.
Na muai faailo lenei faamoemoe e ala i le tele o fonotaga ma sui o le Iunivesite a Western Sydney ia Iulai 2015 ma Tesema 2015, i le valaaulia ai lea o le toatele o taitai o faapotopotoga o tagata Samoa aemaise ai i latou o loo aafia i le gasegase o le mai suka.

11700559_950399275026420_6583107661335848718_o

O GALUEGA UA MAEA FAATINO E OO MAI I LE TAIMI NEI

1. Sa filifilia se tamaitai Samoa o aoga i le Iunivesite o Analise Vaovasa e galue i lalo o le taitaiga ma le faufautua a Polofesa David Simmons – e faamaea se pepa mo suesuega e tufa i taitai uma o faalapotopotoga o tagata Samoa, i le sailia lea o finagalo ma manatu poo ni aitia e faatatau i le mai suka, ae maise foi o uiga faaalia o tagata lautele i ai latou ua maua i le mai suka, atoa ai ma le tali atu i ni galuega faatino talafeagai e tau faaititia ai le vaaia lelei o i latou ua aafia i le mai suka o loo aumau i Sini Ausetalia. Sa mafai foi ona folasia faaiuga o suesuega a lenei tamaitai i se vaega o i latou e popoto faapitoa i le aso 18 o Fepuari 2016 i le Iunivesite o Western Sydney, ma sa talia lelei ma e tele ni fesili ma faatalanoaga ma fautuaga na folasia i lea aso. O le a faapea ona toe faalauiloa atili le iuga o nei suesuega i isi faalapotopotoga o tagata Samoa pe afai ae maea lelei.

2. Ua maea ona filifilia le taitaifono mo faalapotpotoga tagata lautele – ma ua filifili ai le alii fomai o Dr Paniani Patu ma lagolago iai le tamaitai o Audry Hill. O i laua nei o le a galulue vaavaalua ma le vaega o le au suesue a le Iunivesete, ma faatumauina ai lenei faalapotopotoga galulue aua nisi poloketi faapea mo le lumanai.

3. O le faalapotopotoga lea o le Samoan Action Research Group – Vaega galue o vaega suesue o Samoa – e faatusa i se manoa umi, ma e tele ona faapona e ao ona uia seia oo i le taunuuga o le manoa. Ma e soo se suesuega poo ni poloketi faapea, e iai lona faapona, ma e iai foi le taimi faatulagaina e maea ai – ina ia mafai ona lava se taimi e faatino ai ni fautuaga ma faatupulaia le malamalama o tagata i ni faafitauli tetele, ona e tele se galuega e fai e faatino, faaaoga ni lesona e maua mai ai ona faatoa maea lea.

11229839_950401725026175_5605178371500130752_o

4. O loo ua iai foi se isi poloketi foi ua faaigoaina o Suesuega mo tagata Samoa o maua i le mai suka ua amata nei ona tuu faatasia i lalo o le taitaiga a Dr Penny Abbot ma Dr Yasin Shahab o nisi o fomai ua maua le tomai i suesuega faapenei. O loo tuufaatasia ai foi se pepa o sailiiliga e tufa i tagata Samoa o maua i le mai suka o le a faapea ona au tovaa atu i le Powell St Family Practice. O le a faapea foi ona tauaao atu i le vaega galuega o vaega suesue o Samoa – le Samoan Action Research Group mo ni o latou manatu ma ni fautuaga i lea suesuega.

5. O loo tatala pea le avanoa i nisi e fia avea ma sui auai o le Samoa Action Research reference research Group ma o le a logo aloaia atu lava lo outou mamalu i se isi fono o lata mai.

6. Afai foi e fia fai sou sao i nei suesuega, faafesootai mai Dr Olataga Alofivae-Doorbinnia i le Powel St Family Practice. Matou te fiafia ina ia toatele i latou e auai ma avea ma sui o nei vaega tau suesuega – ina ia tele ni faamatalaga e aoina mai e fesoasoani ai i le sailia o ni togafitiga talafeagai mo faamai le pipisi e pei o le mai suka ma isi gasegase. Ia maua ni suiga lelei mo tatou tagata ia faaumiumi le soifua ma fiafia i vaega o nonofo ma aumau ai.

Faailoga lou lagolago i galuega a le Powell St Family Practice faapea faapotopotoga uma o tagata Samoa ma o latou taitai, aemaise i latou o galulue mo le soifua maloloina i le faaitiitia o le aafia o tatou tagata i le gasegase o le mai suka ma faaleo sou manatu i lenei poloketi taua.

Soifua ma ia Manuia

LEAVE A REPLY