SAUNI LA’U SAMOA COUNCIL FAAMANATU SISIGAFUA 2017

0
965

O ai le FILI ua ia toe KALEPEA le NOFO FEALOFANI o FONO e LUA?

Tusia: Tiumalumatua Maifea Fetu – Australia Samoa news

I se faatalanoaga ma le afioga ia Alaalatoa Emani Alaalatoa, Peresitene o le fono a La’u Samoa, ma ua faamautu mai ai ua nofo sauni nei le latou fono e faamanatu le sisigafua i le 2017, talu ai ua lagona lona le fiafia tele faatasi ai ma le mamalu maualuga o la latou laulau a fono, ona ua foliga mai ua kalepe pe ua toe faaleaogaina e le Fono Aoao le iugafono pei ona faamautuina e fono e lua i le tolu tausaga ua mavae. Lea sa faapea ona malilie faatasi ai ina ia galulue faatasi fono i le faamanatuina o sisigafua mo le lima tausaga ona toe iloilo ai lea o se isi fuafuaga alualu mamao. O lea faaiuga sa faapea ona auai atu ai ma lana afioga i le Konesula o Samoa i Ausetalia nei le afioga ia Manogiamanu Fonoti Ioane Etuale i lona talanoaina ma lona faamautuina, ina ia galulue faatasi fono a La’u Samoa ma le Fono Aoao mo le lima tausaga i le faamanatuina o le Tutoatasi o Samoa i le masina o Iuni. O lea foi faaiuga na faaiugafonoina ma saunoa faafetai ai le Konesula e faaleo lona agaga faafetai tele i taitai o fono e lua ma sui uma sa auai i lea po, i lona agaga fiafia ina ua maua se tonu lelei e maua ai foi ma se fealofaniga e le gata i fono e lua, ae faapea foi Samoa o loo aumau i Sini Ausetalia nei. Na saunoa ai le Konesula ina ia laulaututu sui o fono e lua ma uulima faatasi ma lagi ina le pese, “E manao Iesu, i le fealofani nonofo ma felagolagoma’i”, ona ia saunia ai lea ma le tatalo e momoli ai i le lagi le agaga o le faafetai i le Atua le Faavae mau o Samoa, ina ua taoto lagotonu le tofa ma le faautautaga i tupu ma tamalii,failauga ma faletua ma tausi uma sa iai i lea fonotaga.
I le manatu o Alalatoa, ua toe kalepe lava e le Fono aoao lenei faaiuga lelei e maua ai le nofo fealofani o fono e lua ma Samoa uma i Sini nei, ina ua maua tala ua alo lava le sa o le fono aoao ma faamaoopoopo vaega uma mo le sisigafua o lenei tausaga, faatasi ai ma le faafesootaiga o le mafutaga a le aufaigaluega a le Atua i Sini nei lea o loo taitaifono ai le Sea o le Ekalesia Metotisi Sini Niu Sau Uelese le susuga ia Savaii Loto, e aunoa lava ma se toe fia fesootai atu i le latou fono. O le fesili tele lea ua tulai mai, O AI LE FILI POO SATANI UA IA TOE KALEPEA LE NOFO FEALOFANI O FONO E LUA?, na tali Alaalatoa, o lona manatu lava i tagata tuai ia sa leaga muamua ai le fono faufautua i tausaga e tele lea foi ua toe iai i le fono aoao e lei iai i le fono na faamautu ai le faaiuga mo le lima tausaga pei ona taua i luga, lea e iai le tina sa ia molituina(suina) le fono faufautua ina ua le totogia ona itula faigaluega. Na taumafai le tatou nusipepa e fia fesiligia lea tina ma nisi o le au tuai lea ua iai i le fono aoao, ae lei maua se fesootaiga, ae na o le afioga ia Leilua Uesele lea ua avea nei ma taitaifono fou o le Fono aoao, ma fesiligia ai loa i le fesili lea e pei ona tau i luga, tali le taitaifono, o lona lava manatu ma le faanaunautaiga faataitaifono, ina ia toe faafoi i le faaiuga na tasi ma malilie iai fono e lua ma le Konesula, lea pei ona sa sau ai i le tolu tausaga talu ai, e galulue faatasi ma felagolagoma’i fono e lua i aso faapitoa pei o le Tutoatasi, a maea ona toe foi a lea o le fono ia i a latou mafutaga pei ona masani ai, ae ona e le mafai e se manatu se tasi pe toalua foi ona malo i ni manatu se tele ua malilie i se faaiuga ma ua faigata ai lenei mataupu.
Saunoa Leilua i se la talanoaga ma Alaalatoa ma saunoa atu ai o le a malolo La’u Samoa ae lafo atu i le Fono aoao le faamanatuina o le fua i lenei tausaga, ae o le a fai e La’u Samoa le tausagafou, lea lava la o loo taofi iai ma ua ia faailoaina foi i le latou Fono aoao lea fanoga a le Peresitene a La’u Samoa.Faamaonia mai foi e Alaalatoa lea saunoaga, ae lagolago lava La’u Samoa i tapenaga o le sisigafua i lalo o le faafoeina e le Fono Aoaoa, ae ona ua le toe fesootai atu le Fono aoao i La’u Samoa ma ua le maua ai lava ma se femalamalamaiga, ae ua fau toatasi lava le faamoemoe o le Fono Aoao, ae faatoa maua atu le imelu mai le failautusi faatoa maua se avanoa e fono ai fono ia e lua pea maea le faamanatuina o sisigafua o lenei tausaga. Na maua foi i se saunoaga a le taitaifono o le Fono aoao ia Leilua Uesele, so logoina lava e la latou failautusi La’u Samoa i le faamoemoe, ae na faailoa mai e Alaalatoa, e lei lava ma se fesootaiga na maua atu mai le failautusi, pau lea o le imeli lea imeli atu ai le failautusi o le Fono aoao e faailoa atu le fono pe a maea le sisigafua. E foliga mai la, o loo faaletonu ii le fesootaiga i le va lea.
I le faatalanoaga a le tatou nusipepa ma taitaifono o fono e lua ma le afioga i le Konesula,o loo atagia mai ai, o le tofa a le taitaifono a le Fono Aoao, o loo tutusa ma le finagalo o le taitaifono a La’u Samoa, faapea foi ma le tofa faalele i se finagalo o le Konesula Manogiamanu Fonoti Ioane Etuale, ina ia toe foi lava i le mea na malilie faatasi iai, pei ona faaiugafono ina i le tolu tausaga talu ai, e maua ai le maopoopoga ma le fealofaniga o fono e lua ma Samoa o i Sini nei. Saunoa foi le Konesula, e le manao e vaavaai mai isi atunuu e feainai atu o tatou tagata ma feitagai e tauvalea atu ai ma lo tatou atunuu, aemaise e le fiafia lo tatou Alii faaola o Iesu i le le fealofani ma feitaga’i. Ua atagia mai ai foi ii, ua amata lava ona vavala mai le FILI faavevesi mafutaga ma faa felotoleagaai o tagata lea ua Kalepea le faaiuga lelei, ma ua tatau nei ona sui pe tuu loa ia uiga leaga faavevesi tagata ma ua tatau ona galulue felagolagomai Samoa uma mo soo se mea e lelei uma ai ona tagata ua fai Sini Ausetalia ma nofoaga e aumau ai.
Na maua ai foi le avanoa e momoli mai ai ma moomooga alofa ma faamanuiaga i lana Afioga Konesula o Samoa Manogiamanu Fonoti Ioane Etuale i si o tatou atunuu pele Samoa, ma ia manuia le faamanatuina o le tutoatasi i Ausetalia nei pei ona ua tau i manuia Samoa ma le faamanatuina o lona 54 tausaga i Samoa. Faapea foi ona momoli mai ai foi ma faamanuiaga ma alofaaga mai Taitaifono o le Fono Aoao ma le Fono La’u Samoa i si o tatou atunuu ma le faamanatuina o le sisigafua o lenei tausaga 2016.
E avatu ai foi le faamalo mai le tatou nusipepa Samoa le Iniini Samoa (www.iniinisamoa.com) ma le Australia Samoa (www.australiasamoanews.com.au) ma lana pulega, i Fono Samoa e lua ma ona taitai, aemaise lau afioga le Konesula, Malo lava le taulamua i mealelei ma le faafealofani ina o Samoa i nei atunuu.
O upu masani a Samoa, A Sala Uta, Tonu Tai, e leai foi se faiva e asa ma sona maimau. Pule ia le tagata i lona finagalo ma lafoa’i ni masei ma ni faaletonu i nuu le aina, ma tanumia i le tafue o le satauro o le Manumalo o lo tatou Alii o Iesu Keriso ma faagalo atu ai ia sese, ae aumai manumailagi ma le alofa o le Atua Soifua e uli masao ai tapenaga uma o le sisigafua ma lo tatou agai atu ai mo le lumanai. Momoli atu ai ma alofaaga ma faamanuiaga mai le pulega o tatou nusipepa Samoa i lenei tausaga.

LEAVE A REPLY