TUUFATASIA LE AIGA FOU O JOE & KITA I LE FAAIPOIPOGA

0
555

Tusia. Josh Jnr Tia. Melepone
“Si a’u uo e si o’u lalelei e ina tulai ia oe ina sau ia, ia tuuina a’u i lou loto faapei o se faamaufaailoga, e faapei o se faamaufaailoga i lou lima, aua ua matua malosi lo’u alofa mo oe, ua faauluulumamau lo’u tuinanau, ua mumu faapei o se afi mu saesae, si o’u lalelei e ina tulai ia oe ina sau ia” O mafaufauga faivavale ia o le alofa faananau o le poto na tomua ai saunoaga a le faafeagaiga taulagi ia Ps Atapana Poe i le sauniga na tuufaatasia ai le ulugalii fou le faatoafaiava ia Joseph Sio ma lana manamea ia Mekita Fuimaono, pei lava o le masani i sauniga faapenei, le tutulai ma le faaaloalo o le paia i le valaaulia aemaise o aiga na lua tainane uo ma aumeamamae, ae savalia e le tamaitai faaipiipo le ala i lana tautoga a’o faalagolago atu i aao mafanafana o si ona tama sa faafaileleina lona soifua, lea ua fou sauni e tuuina atu i lima o le ua ia filifilia o le a la faatasi se ia oo i le oti, na le toe lagona se leo ina ua muta le pese ae faalologo i le foa’i, ona faafusei lea ona tapisa le uosili ale tama si ona uso ia Victor Sio ma ana aumeamamae ina ua mae’a le foa’i ma patipatia faatasi ai e le mamalu na potopoto ma amata faasolo loa le sauniga paia, o le upu faauuina na tomatauina ai lo la aso tele na saunia e le faafegaiga ia Rev David Drummond, lalelei ma malualii le ulugalii fou ma a la aumeamamae ma uosili pei ona avea ai le tamaitai o Michelle Vaipaepae Tuiloma ma uosili teine. Mae’a le sauniga lotu i le malumalu o le ekalesia a le Truelight Christian Church i le pitonuu o Niddrie, ona alo lea i le taumafataga tele na maau i ai aiga na lua ma faasolo ai pelega o aiga e ala i faafiafiaga matagofie na maualuga atili ai le aso tele o Joe ma Kita, o le fofoga o le aso na feagai ma le susuga ia Salevana Tiale Poe, o le faamoemoe ua taunuu o le aso ua ula i le agalelei o lo la alii faaola o Iesu Keriso, na toia foi le laulau a Tumua i faaaloaloga mo le aufaigaluega ma taape ai ma le viiga sili o le Atua. Ia manuia lo lua aiga fou Joe ma Kita.

2-1 4

LEAVE A REPLY